Na on Saturday July 28th 2012 naim dem officially open one correct and latest beauty studio for calabar. Di studio name na Lush Signature.

Di ogbone opening start by 3:00pm and so many fine fine bobo,babes,family friends and di Creative Director of di place colleague no disappoint am at all as all of dem show face for there to come see wetin dey shelle and di latest beauty studio wey just show face for their town.

Esther Eshiet yarn tory people say Lush Signature na makeup and wellness place and dem ready to treat all their customer with quality services. She yarn say dem no go fall their customer hand at all.

Wonders dem say shall never end. TV presenter Yvonne Ekwere wey people know as Vixev put hand for head on Saturday as she reach where she for pack her motor for inside Oriental Hotel motor park, na so she no come see am again, di ting bi like dream for her eye bicos she say she know where she park her motor.

Di motor wey badosky dem thief so na grey color Toyota Camry v6 salon car 2000model with plate number EX 123 BC Lagos.

Security people wey dey there yarn say dem no see anyting and di management for there no fit show Vixen their CCTV tape weda dem go fit see di persin face wey thief di motor.

Some correct Arsenal players dey for Naija as we dey talk so since last week. Their name na Lucas Podolski, Bacary Sagna and per Meterserker.

Dem do small exercise with Malta Guiness low sugar teacher Kaffy for inside Eko Hotels yesterday. Kaffy come use di opportunity to take teach dem Azonto steps and dem enjoy am no bi small.

Singer and dance hall star Nyore don tell im long time bobo say I do for Benin City on Saturday July 28th. Nyore dey Naija Ninja crew and she don join many people do collabo together bifor bifor. Happy marriage life oh!

Naija basketball team wey go represent for di 2012 London Olympics wey dey go on now don win their first game dis early mon mon. Na dis one make our basketball team bi di first in histort for Naija sport to win for di Olympics.

Dem beat Tunisia 60-56 and dem need to just win one more game bifor dem go enter di second round. Congratulobia to team Naija.

Six people naim don delete since cult gbege start for Uniben. One Uniben graduate wey im name na Nosa Ebohon aka Biggie don delete too for di gbege wey dey happun between Eiye Fraternity and Black Axe members for inside di school.

Na for different place naim Nosa wey kpai and di other people wey kapi too for happun. Na on Friday night naim di cult badosky for delete Nosa for where im for dey relax dey drink beer for one beer parlour wey dey along Adolor College Rd

ThisDay Newspaper publisher, Nduka Obaigbena, yarn tory people say im don ready to launch im own TV station and im yarn say di new TV station go better pass CNN, BBC, Al Jazeera and some other station for obodo oyibo.

Arise TV naim bi di name and dem go officially launch am for second quarter for 2013 and di headquarters go dey for London.

Funmi Iyanda wey bi multi awars winning broadcaster, journalist, columnist dey celebrate im birthday gbedu today for far away NYC. Na today naim she complete 41years. Na July 27th 1971 naim im mama born am. Zazugist dey wish am happy birthday celebration.

Oga Presido Goodluck Jonathan don appoint Dr. Doyin Okupe as im Senior Special Assistant for Public affairs. Di man na medical
doctor and naim be tory persin for former President Obasanjo wen im dey for power.

Reuben Abati naim bi special Adviser for Media and Publicity to presido Jonathan bifor dem come appoint Dr Okupe.

Naija army yesterday Thursday July 26th give some kain equipment to some churches and mosques for North so dat dem go fit use am take dey know wen persin carry bomb.

Di army oga yarn say im present di equipment to dem bicos say people wey get hand for di bombing ting dey always dey use motor take dey carry di Improvised explosive devices (IEDs), im yarn say di equipment no go allow di badosky dem to reach where dem dey carry bomb dey go bifor dem go catch dem.