pidgin

About Zazu Gist

ZAZUGIST DEY SALUTE O!

My people we greet una well well o. Dem say when rabbit dey run for afternoon na either im dey pursue something or something dey pursue am, but when lion dey run nko? Well, nobody dey wait to find out so make we leave matter for there. Ahem – na throat we take that one clear and we just wan yarn una say welcome to ZazuGist compound. Nor be say we wan boast o or we wan make shakara, but we just wan tell una say the first ogbonge 100 percent pidgin website for this whole wild world don land, like play like play. Na we be the lumber one place wey go dey nack una gist like say we dey break melon, whether na serious matter wey oyinbo dey call am news o abi na jolliment and fine-fine things wey dem dey call entertainment o – we dey gidigba. This our compound wey we call Zazugist.com go show una wetin una never see before the one wey some people dey call America wonder and Africa magic. Abeg take head-tie tie your wrapper o and take rope tie your trouser because for here we go make una laugh so tay una go forget say molue and danfo nor dey get seat belt.

The reason wey make us start ZazuGist nor be wetin dem dey climb iroko or palm tree go find. You go agree say e don tay wey people dey treat pidgin like say na old ashawo, no respect but everybody dey enjoy am yanfu-yanfu from Ikot Ekpene reach Peckham reach Brooklyn reach Frankfurt and many many other places wey long pass 3rdMainland Bridge for Lagos. When matter don worwor for waterside or for city sef, everybody go run go meet Pidgin to help solve the matter. So we for ZazuGist say enuf don do, we go find better home for Pidgin where everybody for the whole wild world go gather together dey yarn the language. Those wey sabi am go enjoy am, even those wey e wan learn the language sef go see say university wey dem nor dey get strike or pay money put don land for dia door mouth.

As we talk before we go talk matter wey go make una laugh and una sef go make us laugh. Sake of say we nor go bend mouth talk wetin we take straight eye see, we go also gbege serious matter wey wear trouser for we country Naija and continent Africa because mechanic wey say im shirt nor go dirty na hunger dey wire am. Even some worwor matter wey bad-belle people wan bury under sansan, we go take shovel dig am out and yarn una as we see am.  But sha o, we na jolly people, and all of we for ZazuGist na water, we nor get enemy. If we mistake for wetin we yarn, we nor go say oya bole ka ja, we go say sorry because this na one big family owanbe.

Many things plenty wey we wan do for ZazuGist but dem nor dey unwrap moi-moi at once, na small small. But before you begin tear trouser and corset,  make we tell you as yawa dey gas for anywhere for we country or for obodo oyinbo na so we go dey yarn you kia kia with plenty plenty foto for our Broken News Section.  Weekend shakara or gbedu for town nko, na for we compound you go hear the koko wey shelle for dia – we go show you any celebrity wey tongue lick plate for party and the one wey dey pick im nose like say person hide something for the nose.  What about the one wey dey dance like say na animal farm party and the one wey use spoon chop leaf wey oyinbo dey call salad? Na here you go see them boku.

For the side wey we call Opidgion nko? Hmmm na dia you go see people wey you think say na only Queens English dem dey take yarn, but ZazuGist don give them license to yarn pidgin any how the way wey truck pusher dey take drink pure water.  Another ogbonge thing for this compound be say we nor go hide gist from una, even though say na Uzbekistan or Kafachan the gist go hide,  because we be parrot and parrot nor sabi hide gist, we go yarn am. And we for Zazugist kuku ma know say you like gist die, and we nor blame you sha o because even Jesus Christ, our ogbonge God pikin, like gist well well otherwise why im go ask Peter for Bible say “Who people think say I be sef?”

One major abi na colonel thing wey make us start ZazuGist be say we all must join hand together to find the Panadol wey go segemenge some of we country wahala.  Suffer head must go! We beg una make una join us, if you see how things go better for your area make you yarn us and we go help you holla.

Since our signboard say FOR WE PEOPLE,BY WE PEOPLE OF WE PEOPLE, you must to come to ZazuGist everyday for your daily gist because dem nor dey carry sacrament go meet who nor come church o.

Ok make I nor waist una time too much because, molue driver don dey para for conductor say I too yarn like say I be Gbogbonise hawker. Oya wole! No change o.

Na so e just be.

Victor Ehikhamenor

Editor-in-Gist

One thought on “About Zazu Gist”

  1. Na correct work una dey do! Na this kin beta work wey carry bele Naija people dey find. Papa God don bless una finish.

Comments are closed.